რეგიონის მასშტაბით ზოგადსაგანმანათლებლო და სკოლამდელი აღზრდის დაწესებულებებში არსებული მდგომარეობის განხილვის მიზნით, სახელმწიფო რწმუნებულის ადმინისტრაციაში სამუშაო შეხვედრა გაიმართა
რაჭა-ლეჩხუმ ქვემო სვანეთში სახელმწიფო რწმუნებულის, პაპუნა მარგველიძის ხელმძღვანელობით, სამუშაო შეხვედრა ონლაინ რეჟიმში შედგა, რომელშიც მუნიციპალიტეტების მერები, საკრებულოს თავმჯდომარეები, რესურსცენტრის და ა(ა)იპ სკოლამდელი სააღმზრდელო დაწესებულებების ხელმძღვანელები მონაწილეობდნენ.
შეხვედრაზე განიხილეს მხარის მასშტაბით სკოლებსა და ბაღებში არსებული ვითარება, საჭიროებები და ინფრასტრუქტურის გაუმჯობესების მიზნით მიმდინარე სამშენებლო სამუშაოები.
ამ დროისთვის, რეგიონში, აქტიურად მიმდინარეობს 5 სკოლისა და 3 საბავშვო ბაღის სარეაბილიტაციო სამუშაოები, ხოლო თანამედროვე სტანდარტების სრული გათვალისწინებით შენდება 5 ახალი ბაღი.
‘’საგანმანათლებლო ინფრასტრუქტურის განვითარება ჩვენი სახელისუფლებო გუნდის ერთ ერთი პრიორიტეტია და ამ მხრივ ბოლო წლების მანძილზე არაერთი მასშტაბური პროექტი განხორციელდა, აღნიშნული პროცესი კვლავ გრძელდება და მიზნად ისახავს სასწავლო, სააღმზრდელო პროცესის კომფორტულ, გარემოში განხორციელებას, რაც დადებითად აისახება განათლების ხარისხზე’’-აღნიშნა პაპუნა მარგველიძემ.
