26 მაისს საქართველოს დამოუკიდებლობის დღე მთელი ქვეყნის მასშტაბით დიდი საზეიმო ღონისძიებებით აღინიშნა. მათ შორის გამორჩეული იყო ლენტეხშიც. ჩატარდა სპორტული, კულტურული და შემეცნებითი სახის ღონისძიებები, რომლებშიც მონაწილეობა მიიღეს ლენტეხის მუნიციპალიტეტის თითქმის ყველა სკოლის მოსწავლეებმა. ღონისძიებებს ესწრებოდნენ მერიის განათლების, კულტურის, სპორტის განვითარებისა და კულტურული მემკვიდრეობის დაცვის სამსახურის უფროსი მედიკო ხვისტანი და ლენტეხის რესურს ცენტრის ხელმძღვანელი ბადრი ქარდავა.
საქართველოს დამოუკიდებლობის დღის აღსანიშნავად, მთელი დღის განმავლობაში, სხვადასხვა ლოკაციებზე გამართულ კულტურულ და სპორტულ ღონისძიებებში ლენტეხის მუნიციპალიტეტის თითქმის ყველა სკოლის მოსწავლეები ჩაერთნენ.
ჩვენი ქვეყნისთვის ამ უმნიშვნელოვანესი თარიღის აღნიშვნა განსაკუთრებით მოზარდი თაობისთვის იყო საზეიმო და სასიხარულო, ამიტომაც არ შეუშინდნენ ნისლსა და წვიმას და დილიდან აახმაურეს ქუჩები, სპორტული მოედნები, საგამოფენო და საკონცერტო დარბაზები.
საზეიმო დილა ლენტეხის N1 და N2 საჯარო სკოლების ბაზაზე არსებულ სპორტულ მოედანზე, საქართველოს ბავშვთა და სასკოლო სპორტის ეროვნული ფედერაციის მიერ ინიცირებული, ფესტივალის ხასიათის, საპილოტე რეჟიმში განხორციელებული პროექტით -» საქართველოს თავისუფლების თამაშები» დაიწყო.
ღონისძიება საქართველოს ჰიმნით გაიხსნა, მისასალმებელ სიტყვებში გამომსვლელებმა ჩვენი ქვეყნის ისტორიის მუდმივად თავისუფლების მოპოვების, მიღწევების და შენარჩუნებისთვის სახელოვანი ბრძოლის ისტორია გაიხსენეს.
აღსანიშნავია, რომ «საქართველოს თავისუფლების თამაშების» სკოლათშორისი სპორტული ღონისძიების ორგანიზებულად, მაღალ დონეზე ჩატარება რესურსცენტრის მეთოდისტის დონარა მუსელიანის დამსახურებაა.
გარდა ამისა, აღსანიშნავია, რომ ლენტეხის ცენტრალური ბიბლიოთეკის დარბაზში მოეწყო სამხატვრო სკოლის მოსწავლეთა ნამუშევრების გამოფენა. სამხატვრო სკოლის დირექტორმა, თამილა ლიპარტელიანმა ჩვენთან საუბრისას აღნიშნა, რომ ამჟამად სკოლას 78 მოსწავლე ჰყავს, რომელთაც აქვთ შესაძლებლობა, შეისწავლონ სხვადასხვა სახის მასალაზე მუშაობა, როგორებიცაა: თექა და გობელინი. აქ ასევე ისწავლება ფერწერა, გრაფიკა, ხეზე კვეთა და ხელოვნების ისტორია.
სკოლას საკმაოდ ბევრი წარმატება და მიღწევა აქვს. 2018 წელს მონაწილეობა მიიღეს კონკურსში, რომელიც კაბადოკიაში ჩატარდა. 2019 წელს იყვნენ აზერბაიჯანში. ხოლო, 2021 წელს — ბულგარეთში, სადაც ბავშვები დაჯილოვდნენ 12 მედლით, აქედან, 2 მონაწილე გახდა პირველი ადგილის მფლობელი, დანარჩენი 10 — მეორე ადგილის. ყოველწლიურად მონაწილეობას იღებენ ბათუმის საერთაშორისო ფესტივალზე, სადაც მიღებული აქვთ მედლები,სერთიფიკატები და დიპლომები.
თითქმის ყველა სფეროში ვიხილეთ იმ დღეს ლენტეხელი ახალგაზრდების შესაძლებლობები, მათ შორის — ჭადრაკში, სპორტის სხვადასხვა სახეობებში და ქორეოგრაფიაშიც.
მოსწავლე ახალგაზრდობის სახლში გამართულ კონცერტში ლენტეხის თვითმოქმედი ქორეოგრაფიული და ფოლკლორული ანსამბლები, მუსიკალური სკოლის და მოსწავლე ახალგაზრდობის სახლის აღსაზრდელები მონაწილეობდნენ.
მოამზადა მარიამ ჯამბურიძემ
