ახალგაზრდა თაობა ქვეყნის განვითარებაში ყოველთვის ყველაზე მნიშვნელოვან როლს ასრულებს. მათი მოსმენითა და აზრების გათვალისწინებით მყარი საფუძველი ექმნება ქვეყნის სიძლიერეს.სწორედ ამიტომ, ჩვენ გადავწყვიტეთ ლენტეხელ ახალგაზრდებთან გასაუბრება, მათი შეხედულებების მოსმენა, რა სურვილები აქვთ, რა გამოწვევების წინაშე დგანან და როგორ წარმოუდგენიათ ლენტეხის განვითარება.
ამჯერად ლენტეხის N1 საჯარო სკოლის რამდენიმე მოსწავლეს გავესაუბრეთ: თეკლა ონიანი (17 წლის), ანანო ქურასბედიანი (17 წლის), სალომე გასვიანი (17 წლის), ნინი ქურასბედიანი ( 16 წლის),თამარ ბენდელიანი ( 16 წლის).
- რადგან ლენტეხში სპორტი განსაკუთრებულად უყვართ და წარმატებებიც დიდი აქვთ ამ კუთხის შვილებს არამარტო ჩვენი ქვეყნის, არამედ მსოფლიოს მასშტაბით, საუბარიც სპორტით დავიწყეთ. მაინც რომელი სახეობის სპორტის განვითარებას ისურვებდნენ ლენტეხში?
- ვისურვებდით, განსაკუთრებული ყურადღება მიექცეს ფეხბურთის, კალათბურთის, ფრენბურთისა და ძიუდოს განვითარებას. თითოეულ სახეობაში გვყავს ნიჭიერი თანატოლები და ვისურვებდით გვქონდეს უკეთესი პირობები ნიჭის რეალიზებისთვის.
ლენტეხში ყველაზე დიდი პოპულარობით გამოირჩევა ჭიდაობის ერთ-ერთი სახეობა ძიუდო, ამიტომ, აუცილებელია, რომ ყველანაირი პირობა იყოს იმისათვის, რომ მსურველებმა ადგილზე შეძლონ სრულყოფილად შესწავლა და ამისთვის სხვა ქალაქში წასვლა არ მოუწიოთ. ყველამ ვიცით,რომ ლენტეხლები ჭიდაობაში ყოველთვის გამოირჩეოდნენ. სამწუხაროდ, ნელ-ნელა იკლებს ინტერესი და აქტივობა სპორტის ამ სახეობის მიმართ, რადგან არ აქვთ შესაფერისი რესურსი, დარბაზი და აღჭურვილობა.
საკმაოდ კარგი ადგილია სპორტ-კომპლექსი, რომელიც საჭიროებს რესტავრაციას. იქ არის აუზი, სპორტ-დარბაზისთვის საჭირო აღჭურვილობა, მაგრამ გამოკეტილია და არ ფუნქციონირებს.
ფრენბურთის თამაშის მსურველთათვის არანაირი პირობა არ არსებობს, რომ თავიანთი ნიჭი ამ განხრითაც წარმოაჩინონ. მხოლოდ სპორტის გაკვეთილზეა შესაძლებელი ფრენბურთის თამაში. - გარდა სპორტისა, რისი უკმარისობის განცდა გაქვთ, რა გინდათ, რომ თქვენს თაობას გქონდეთ ლენტეხში?
- ვფიქრობთ, რომ ბიბლიოთეკის გამოცოცხლება უმნიშვნელოვანესია. ხანდახან მავიწყდება, რომ ლენტეხში ბიბლიოთეკა გვაქვს, სიმბოლურად არის შენობა. ძალიან კარგი იქნებოდა მყუდრო და მშვიდი ადგილი, სადაც შევძლებდით კითხვას და დროის საინტერესოდ გატარებას.
კარგი იქნებოდა, მწვანე ბაღის რესტავრაცია რომ ჩატარდეს. ის გამოირჩევა თავისი სიმწვანით, ბუნებით, ჰაერით. წლების წინ სხვადასხვა სახის ღონისძიებებიც იმართებოდა, იყო თავშეყრის ერთ-ერთი ადგილიც.
ჩვენი შემეცნებითი ცოდნის გაღრმავებაში დაგვეხმარებოდა კინო-საღამოების მოწყობა,
კარგი იქნებოდა, პატარა კაფეები რომ გაიხსნას. - თქვენი აზრით, რა არის საჭირო ლენტეხის პოპულარიზაციისთვის?
- პირველი, რაც გვახსენდება არის მუაში, გამორჩეული თავისი ბუნებით და ადგილმდებარეობით. აქვს განვითარების დიდი პოტენციალი. მშობლების გადმოცემით ვიცით, რომ ერთ-ერთი გამორჩეული კურორტი იყო საქართველოს მასშტაბით. ვისურვებდით, დაუბრუნდეს ძველი ფუნქცია და იერსახე.
- კარგი იქნებოდა, ხშირად ტარდებოდეს გაცნობითი სახის კაფე-საღამოები, სადაც შესაძლებელი იქნება, უკეთ გავიცნოთ გამოჩენილი ადამიანების შემოქმედება. საამაყოა, რომ სვანებს გვყავს ბევრი წარმატებული ადამიანი სხვადასხვა სფეროში, თუმცა ბევრმა მათი სახელიც კი არ იცის და მსგავსი საღამოები საზოგადოებას დაეხმარება მათ შესახებ ცნობიერების ამაღლებაში.
- თქვენ რომ იყოთ ადგილობრივ ხელისუფლებაში, პირველ რიგში რას გააკეთებდით?
- პირველ რიგში, მოვაწესრიგებდით გზებს.
საჭიროა, მიუსაფარ ძაღლთა თავშესაფარი. საფრთხეს წარმოადგენს ქუჩაში აუცრელი ძაღლების თავისუფლად გადაადგილება. საზოგადოების ნაწილს აქვს მათ მიმართ შიში. - რაიონში და სოფლებში ძალიან დიდ პრობლემას წარმოადგენს ახალგაზრდების გადინება. თქვენი აზრით რა არის ამის მიზეზი და როგორ უნდა მოგვარდეს?
- აქ ახალგაზრდებს არ აქვთ სრულყოფილი შესაძლებლობა, რომ თავიანთ საქმიანობაში განვითარდნენ და კვალიფიკაცია აიმაღლონ. თუმცა მე ვიცი,რომ ლენტეხში დავბრუნდები და ჩემს ცოდნას აქაურობის განვითარებას მოვახმარ. ჩვენ, ადგილობრივები თუ არ შევცვლით, ჩვენს ნაცვლად არავინ არაფერს იზამს.
ლენტეხს აქვს დიდი პერსპექტივა, რომ სოფლის მეურნება უფრო განვითარდეს.თუმცა, პრობლემას მუშა-ხელის ნაკლებობა წარმოადგენს. ამის შედეგად გაჩნდება სამუშაო ადგილები. უნდა ვეცადოთ,რომ აქედანვე მივეჩვიოთ შრომას და ერთმანეთს მივცეთ სტიმული. ფიზიკური შრომა არ უნდა ეთაკილებოდეს არავის. - ესაუბრა მარიამ ჯამბურიძე
