რაჭა-ლეჩხუმ-ქვემო სვანეთის სახელმწიფო რწმუნებულის, პაპუნა მარგველიძისა და მაჟორიტარი დეპუტატის, გოჩა ენუქიძის ხელმძღვანელობით სამინისტროების რეგიონული სამსახურების წარმომადგენლებთან სამუშაო თათბირი გაიმართა. შეხვედრას სამინისტროების რეგიონული სამსახურების წარმომადგენლებთან ერთად, სახლემწიფო რწმუნებულის მოადგილეები, ქრისტინა კობახიძე, ალუდა თუთისანი, ბერდია ჩანქსელიანი ესწრებოდნენ.
მიმდინარე წელს გაფართოებული თათბირის პირველი სხდომა შედგა, სადაც ხელისუფლების წარმომადგენლებმა გასული წელი შეაჯამეს და სამომავლო გეგმებზე დეტალურად ისაუბრეს.
რაჭა-ლეჩხუმისა და ქვემო სვანეთის რეგიონში გასულ 2023 წელს საგზაო ინფრასტრუქტურის კეთილმოწყობის მიზნით, სხვადასხვა ფონდებიდან განხორციელდა — 83 პროექტი და ჯამში დაიგო 103 კმ-მდე ასფალტის საფარი.
პროგრამის „განახლებული რეგიონების’’ ფარგლებში რეგიონის მასშტაბით მოეწყო 4 სკვერი.
საგანმანათლებლო ინფრასტრუქტურის განვითარების მიზნით, საქართველოს მთავრობის მხარდაჭერით, რეგიონში არსებული 68 სკოლიდან 2023-2025 წლებში დაგეგმილია და მიმდინარეობს 13 საჯარო სკოლის სრული სარეაბილიტაციო სამუშაოები, რაზეც ჯამში დაიხარჯება 20 000 000 ლარი.
საბავშვო ბაღების სამშენებლო და სარეაბილიტაციო პროგრამის ფარგლებში, დაგეგმილია თანამედროვე სტანდარტების 4 ახალი საბავშვო ბაღის მშენებლობა — ღირებულებით 9 048 230 ლარი და 4 საბავშვო ბაღის სრული რეაბილიტაცია — ღირებულებით — 11 267 000 ლარი.
მიმდინარე წელს კვლავ აქტიურად გაგრძელდება პრიორიტეტული და საჭირო პროექტების მშენებლობა, რისთვისაც პირველი ეტაპისათვის რეგიონში განსახორციელებელი პროექტების ფონდიდან 21 მილიონი ლარი გამოიყო, რომლის ფარგლებშიც 95 ობიექტზე განხორცელდება სამუშაოები.
