ლენტეხის სამხატვრო სკოლამ, რომლის ხელმძღვანელიცაა თამილა ლიპარტელიანი, 14 ივნისს სკოლის მოსწავლეთა ნამუშევრების წლის შემაჯამებელი გამოფენა თამარ მეფის ხეივანში გამართა. გამოფენაზე წარმოდგენილი იყო 78 მოსწავლის ნამუშევრები: ფერწერა, გრაფიკა , გობელინი, თექა, ხის მხატვრული დამუშავების ნიმუშები.
გამოფენაში მონაწილეობა მიიღეს ხელედის ჯგუფის მოსწავლეებმა.
გამოფენა დაათვალიერა ლენტეხის მერმა, გია ონიანმა, საკრებულოს თავმჯდომარემ, გიორგი გაზდელიანმა, კულტურის, სპორტისა და ძეგლთა დაცვის სამსახურის უფროსმა მედიკო ხვისტანმა, კულტურულ ორგანიზაციათა გაერთიანების უფროსმა ბესო გაზდელიანმა, საკრებულოს თავმჯდომარისა და მერის მოადგილეებმა: დავით პირველმა, ზვიადი ლობჟანიძემ და მარადი ლიპარტელიანმა.გამოფენას განსაკუთრებული ჟრიამული შემატა საბავშვო ბაღის გამოსაშვები ჯგუფის აღსაზრდელების სტუმრობამ (პედაგოგები ნათია გუგავა და თეონა მუკბანიანი).
გამოფენა ასევე დაათვალიერეს რაიონში შემოსულმა ტურისტებმა და ადგილობრივებმა.
26 ივნისიდან 30 ივნისის ჩათვლით კი ლენტეხის სამხატვრო სკოლის 41-მა მოსწავლემ მონაწილეობა მიიღო ბათუმში საერთაშორისო ფესტივალ-კონკურსში ,,Wonderland- From Georgia With Love 2024″, რომელიც ორგანიზებული იყო შ.პ.ს ,,TeM Travel» და შ.პ.ს. ,,Geo Fest, Georgia» — ს მიერ.
ფესტივალ-კონკურსში მონაწილეობდნენ როგორც საქართველოს , ასევე — ლატვიის, ყაზახეთის, უკრაინის, გერმანიის, ისრაელის,ლიტვის, სომხეთის წარმომადგენლები.
ჟიურის შეფასებით, უმაღლესი შეფასება — 41 პირველი ადგილი, მედლითა და თასით, მოიპოვეს ლენტეხის სამხატვრო სკოლის წარმომადგენლებმა.
სამხატვრო სკოლის დირექტორი, ქალბატონი თამილა ლიპარტელიანი მადლობას უხდის ორგანიზატორებს მიწვევისთვის და ჟიურის — უმაღლესი შეფასებისთვის. ხოლო მხარდაჭერისთვის მადლობას უხდის ლენტეხის მერს, გია ონიანს, კულტურის, სპორტისა და ძეგლთა დაცვის სამსახურის უფროსს, მედიკო ხვისტანს და კულტურულ ორგანიზაციათა გაერთიანების უფროსს, ბესო გაზდელიანს.
ჩვენი რედაქცია კიდევ ბევრ წარმატებას უსურვებს ლენტეხის სამხატვრო სკოლას სამომავლოდ!
ნატა გულბანი
