ლენტეხის მერის პასუხი ახალგაზრდებს
ჩვენმა მკითხველებმა იციან, რომ გაზეთ „ლენტეხიnews”-ის მე-4 ნომერში გამოქვეყნდა სტატია „რა სურთ ლენტეხელ ახალგაზრდებს“, სადაც ახალგაზრდებმა გამოხატეს თავიანთი აზრი იმ საკითხებზე, რაც სურთ, რომ ლენტეხში უფრო განვითარებული იყოს.
ჩვენ ახალგაზრდების მოსაზრებებთან დაკავშირებით კომენტარი ვთხოვეთ ლენტეხის მერს, ბატონ გია ონიანს, რომელიც თავადაც დაინტერესებულია, რომ მაქსიმალურად გაითვალისწინოს ლენტეხელი ახალგაზრდების სურვილები.
- ბატონო გია, როგორც ვიცი, თქვენ გაეცანით წინა ნომრის სტატიაში ახალგაზრდების გამოთქმულ სურვილებს და გვსურს, უპასუხოთ მათ. რა სიახლეები იგეგმება ახალგაზრდებისთვის ლენტეხში?
- მოგესალმებით, მე მინდა, გამოვეხმაურო ახალგაზრდების სტატიას. ძალიან საინტერესო იყო ჩემთვის და ყოველთვის ვცდილობ, გავითვალისწინო მათი აზრი, განსაკუთრებით იმ ახალგაზრდების, ვისაც სურთ ლენტეხის წინსვლა-განვითარება, გული შესტკივათ მშობლიურ რაიონზე.
პირველი საკითხი, რასაც ახალგაზრდები აღნიშნავდნენ, ეს იყო სპორტის განვითარებისთვის მეტი ხელშწყობა. მინდა გითხრათ, რომ ამ მიმართულებით ჩვენ მნიშვნელოვანი ნაბიჯები გვაქვს გადადგმული და ამჟამადაც მიმდინარეობს. დავიწყებ სპორტდარბაზით. სპორტდარბაზის რეაბილიტაცია თითქმის დასრულებულია. ამ კუთხით ძალიან დიდი მხარდაჭერა გვაქვს ჩვენ სპორტისა და კულტურის სამინისტროსგან, ქალბატონ თეა წულუკიანისგან.
როგორც ვიცით, უკვე შესყიდულია საჭირო ინვენტარი როგორც კრივის სექციისთვის, ასევე — ფრენბურთისა და კალათბურთის სექციებისთვის. კალათბურთის სექციას რაც შეეხება, უკვე გვყავდნენ სტუმრად კალათბურთის ფედერაციის წარმომადგენლები, ჩვენი რაიონელი შალვა ონიანის ხელმძღვანელობით და გვითხრეს, როგორც კი დასრულდება სპორტდარბაზის რეაბილიტაცია, მოგვაწვდიან საკალათბურთო ინვენტარს.
რაც შეეხება ძიუდოს, სპორტის ეს სახეობა, რა თქმა უნდა, განსაკუთრებით განვითარებადი და პოპულალურია ჩვენთან. ველოდებით ახალ ლეიბებს კულტურის სამინისტროდან.
ასევე გვსურს მეკლდეურების ახალი კედლის გაკეთებაც. გარეთ არსებული და შიგნით არსებული ძველი კედლები დავშალეთ და გვინდა, რომ ახალი, თანამედროვე სტანდარტის კედელი გავაკეთოთ. ვეცდებით, წელს მოვასწროთ, თუ არადა, მომავალ სეზონს აუცილებლად მოვაგვარებთ.
აქვე მინდა, განსაკუთრებით აღვნიშნო, რომ ჩვენ დავიწყეთ კურორტ მუაშის სპორტული განვითარება. წელს არა მარტო ლენტეხში, არამედ საქართველოში პირველად ჩატარდა ზამთრის სპორტულ სახეობაში ბიატლონის ჩემპიონატი, სპორტისა და კულტურის სამინისტროს მხარდაჭერით. ბიატლონის ფედერაციის ხელმძღვანელი, ბატონი სოსო ბაღათურია ჩართულია პირადად და წინა დღეს გადამაგზავნინა იმ ინვენტარის ჩამონათვალი, რაც გვჭირდება, რათა ზამთარში თავიდან სრულფასოვნად აღდგეს როგორც ვარჯიში, ასევე დიდი შეჯიბრებები ჩავატაროთ.
გარდა ამისა, გვაქვს ერთი კარგი სიახლე: ერთ-ერთი პირველი რეგიონი ვართ საქართველოში, სადაც რაგბის განვითარება დავიწყეთ. გაიხსნა სარაგბო კლუბი „ამარანტი“. კარგი ადამიანების მხარდაჭერითა და დაფინანსებით უკვე ერთ წელიწადში ამ წარმატების შედეგმაც არ დააყოვნა და ახლახანს ონში გამართულ სარაგბო ფესტივალზე ყველა შეხვედრა ლენტეხის „დათვებმა“ მოიგეს. შედეგად, ჩვენი „ამარანტები“ სრულიად უფასოდ მიდიან შეკრებაზე ურეკში და ესეც ჩვენი კარგი სპონსორების მახრდაჭერითა და დაფინანსებით ხდება, ოჯახსა და ბავშვს არ უჯდებათ არაფერი არც ფორმა, არც — შეკრება. ყველაზე სასიამოვნო ფაქტი ისაა, რომ მთელი ლენტეხის მასშტაბით გვაქვს ათვისებული სპორტული მიმდინარეობა, რაც წინა წლებისგან განსხვავებით, დიდი ფუფუნებაა, როდესაც ბავშვს თავის სოფელში აკითხავს მიკრო ავტობუსი, მიჰყავს ვარჯიშზე, სადაც ვარჯიშს სრულიად უფასოდ და უსასყიდლოდ უტარებენ, შემდეგ კი ისევ უკან, სახლში მიჰყავს ავტობუსს. ასეთი რამ საქართველოს მაშტაბით არსად ხდება. ასე რომ, სპორტის მიმართულებით ძალიან დიდი ცვლილლებები გვაქვს. - კულტურული განვითარების კუთხით რა მდგომარეობაა მუნიციპალიტეტში?
- ამ ეტაპზე რაც შემიძლია, გითხრათ, არის ის, რომ ლენტეხში კულტურის სახლის მშენებლობა თითქმის დასრულდა, წყალგაყვანილობა დასასრულს უახლოვდება და სულ მალე ძალიან დიდი და მასშტაბური ღონისძიება დაიგეგმება მისი გახსნისთვის. დაახლოებით ერთ თვეში ვიხილავთ გახსნას
- ბატონო გია, კიდევ რა აქტივობები იგეგმება ახალგაზრდებისთვის?
- გარდა ამისა, მინდა, აღვნიშნო, რომ ლენტეხის მერია ეხმარება მუნიციპალიტეტში ყველა მცხოვრებ ახალგაზრდას, მიიღოს სრულყოფილი განათლება ცეკვისა და სიმღერის მიმართულებით. კულტურის ცენტრია ჩვენთან შემოსული და ძალიან გვეხმარებიან. ასევე რამდენიმე წელია, ლენტეხშია გახსნილია ფოლკლორის ცენტრი და წინა კვირაში გადაწყდა, რომ ჩოლურის თემში გაიხსნას დამატებით ფოლკლორის ცენტრი, რასაც კულტურის სამინისტრო დააფინანსებს, რაც ჩვენთვის ძალიან დიდი მხარდაჭერაა.
- ბატონო გია, ახალგაზრდებმა ასევე გულისტკივილი გამოთქვეს, რომ ლენტეხში არ არის თანამედროვე სტანდარტების ბიბლიოთეკა. რას გვეტყვით ამ საკითხზე?
- მესმის ახალგაზრდების გულისტკივილი და მინდა, ვუთხრა მათ, რომ ბიბლიოთეკის სრული რეაბილიტაციის პროექტი უკვე მზადაა, ველოდებით მცირე ტექნიკურ ნაბიჯებს, ვიმედოვნებდით, რომ მისი სრული რებილიტაცია წელს მოხდებოდა, თუმცა, ჯერ არაა გადაწყვეტილი. მაგრამ ეს იმედი ჯერ არ გაქარწყლებულა, ვიმედოვნებთ, რომ იგივე შენობის სრულ რეაბილიტაციას მალე მოვახერხებთ.
- წარმატებებს გისურვებთ, ბატონო გია!
სტატია მოამზადეს: მარიამ ჯამბურიძემ და თაკო დოდაშვილმა
